ဦးသိန်းစိန်အစိုးရမှ ပြည်ပသို့ ရောက်ရှိနေခဲ့သော မြန်မာများကို မြန်မာပြည်သို့ပြန် လာရန်လမ်း ဖွင့်ဖိတ် ခေါ်သည့် သတင်းကို သြဂုတ်လ(၁၇) ရက်နေ့တွင်နေပြည်တော်မှသတင်း ထွက်ပေါ်လာခဲ့သည်။ထိုသတင်းကို တရားဝင် ကြေညာချက်အဖြစ် ထုတ်ပြန်ပေးရန် လိုအပ်ပေသည်။
ကျွနုပ်တို့ ပြည်ပရောက်နေသော တော်လှန်ရေးမျိုးဆက် အသီးသီးက ထိုထွက်ပေါ်လာသော သတင်းနှင့် ပတ်သက်၍ တဦးချင်း အမြင် သဘောထားများကို ဆွေးနွေးညှိနှိုင်းကြပြီး အောက်ပါ အချက်များကိုသဘောတူ ထုတ်ပြန်လိုက်သည်။
၁။ ပြည်ပသို့ရောက်နေသူများကို လမ်းဖွင့်ဖိတ်ခေါ်လိုက်ခြင်းသည် အပြုသဘောဆောင်သည့်အတွက်ကြိုဆို သော်လည်း အဆင့်ကျော်နေသည်ဟု မြင်သည်။ပြည်တွင်းရှိ နိုင်ငံရေး အကျဉ်းသားများကို ယခုအချိန်ထိလွှတ် မပေးပဲထားရှိပြီး ပြည်ပတွင်ရှိသော တော်လှန်ရေးမျိုးဆက်များကိုလက်ကမ်းကြိုဆိုခြင်းသည် ပထမဆုံး လုပ်ရ မည့် အလုပ်မဟုတ်ခြေ ပထမဦးစွာပြုလုပ်ရမည့် လုပ်ငန်းစဉ်သည် ပြည်တွင်းရှိ နိုင်ငံရေး အကျဉ်းသားများကို ချွင်းချက်မရှိ လွှတ်ပေးရေးဖြစ်သည်။ သို့မှသာ အမျိုးသားရင်ကြားစေ့ရေးကို ဦးတည်သည့် ပထမဆုံး ယုံကြည် မှုတည်ဆောက်သည့်ခြေလှမ်းတရပ် ဖြစ်ပေလိမ့်မည်။
၂။ ဦးသိန်းစိန် အစိုးရ အနေဖြင့် ပြည်သူကို ယုံကြည်ဖို့လိုသည် ပြည်သူလိုလားချက်ကို ရဲရဲဝင့်ဝင့် အကောင် အထည် ဖေါ်ရဲဖို့လိုသည်။ယနေ့ နိုင်ငံရေး အတိုက်ခံများ အပါအ၀င် ပြည်သူတရပ်လုံး၏ လိုလားချက်မှာ နိုင်ငံရေး အကျဉ်းသားများအားလုံး ချွင်းချက်မရှိ လွတ်မြောက်ရေးပင်ဖြစ်သည်။
မြန်မာပြည်တိုးတက်ဖွံ့ဖြိုးရန်မှာ ပြည်သူလူထုကြီးက လိုလိုလားလား အားတက်သရော ပါဝင်လုပ်ဆောင်မှသာ အောင်မြင်နိုင်မည် ဖြစ်သည်။ယနေ့ပြည်သူများလိုလားနေသည်မှာ တရားမျှတသော ဥပဒေအောက်တွင် ကြောက်လန့်ကင်းကွာ နေနိုင်ရေး၊လွတ်လပ်စွာ စီးပွားရှာဖွေခွင့် ရရှိရေး၊လွတ်လပ်စွာ ပြောဆိုရေးသားခွင့်ရရှိ ရေး၊လွတ်လပ်စွာစည်းရုံးပိုင်ခွင့်၊ လွတ်လပ်စွာရွေးချယ်ပိုင်ခွင့် ရရှိရေးတို့ပင်ဖြစ်သည်။
၃။ မဆလ ခေတ်မှ ယနေ့စစ်ခေါင်းဆောင်များအဆက်ဆက် လက်အောက်တွင် ပြည်သူများ ကြောက်လန့် စွာဖြင့် အကြောက်တရားအောက်တွင် နေထိုင်နေကြရပြီး တရား ဥပဒေကင်းမဲ့သည့် စစ်အာဏာစက်အောက် တွင် ကြီးပျင်းလာခဲ့ကြသည့်အတွက် အုပ်ချုပ်သူလူတန်းစားအား ရွံကြောက်ကြီး ဖြစ်နေကြခဲ့ရသည်။ မချစ်သော်လည်း အောင့်ကာနမ်းနေကြရသဖြင့် ပြည်သူ့ဘ၀ ပြည်သူ့အကျိုး၊ ပြည်သူ့လိုလားချက်၊ ပြည်သူ့နစ်နာချက်များ ဖော်ပြခွင့်မရပဲ ဆိတ်သုံးခဲ့ရသည်။
အုပ်ချုပ်သူလူတန်းစားများ အနေနှင့်လည်း အဓမ္မဖိနှိပ်အုပ်ချုပ်နေရသူများ ပီပီ မိမိတို့၏ တရားမဲ့ လုပ်ရပ်များ အပေါ် ပြည်သူများ၏ တန်ပြန်ဒဏ်ခတ်ခံရနိုင်မှုအတွက် ရတက်မအေး အစောင့် အထပ်ထပ်ချ၍ ပြည်သူကြားတွင်မတိုးရဲဘဲပြည်သူနှင့်ကင်းကွာလျှက်အကျဉ်းကျ နေ ရသည့် ဘ၀ပင်ဖြစ်သည်။ ပြည်သူများ အကျဉ်းကျနေသလို အုပ်ချုပ်သူလူတန်းစားများ လည်းအကျဉ်း ကျ နေရသည့် ဘ၀ဖြစ်သည်။
၎။ ထိုအချက်ကို ဖောက်ထွက်ရန်မှာ ပြည်သူရိုသေလေးစားသော အစိုးရတရပ်ဖြစ်လာရန် ပြုပြင်ပြောင်း လဲနိုင်ဖို့လိုသည်။ပြည်သူများလိုလားချက်ကို ဖြည့်ဆည်းပေးသော အစိုးရဖြစ်လာလျှင် ပြည်သူများ၏ ချစ်ခင် ကိုး စားမှုကို ရရှိလာပေလိမ့်မည်။ကောင်းမွန်သော အစိုးရကို ပြည်သူများက ချစ်ကြောက်ရိုသေပြီးတရား ဥပဒေ အတိုင်း လိုက်နာကျင့်သုံးခြင်းဖြင့် ပြည်သူ့ အကျိုးအတွက် အစိုးရ၏ လုပ်ဆောင်ချက်များကို မိမိသဘောနှင့် မိမိ လိုလိုလားလား စိတ်ပါလက်ပါ ၀ိုင်းဝန်ီး လုပ်ဆောင်ကြလျှင် တိုင်းပြည်ကြီး ဆင်းရဲတွင်းမှ လျှင်မြန်စွာ ရုန်းထွက်၍ အာရှတိုက်တွင် တိုးတက်ဖွံ့ဖြိုးသော လူအခွင့်ရေး ပြည့်ဝသည့် အာရှတိုက်၏ကျား တကောင်အဖြစ် ဦးမော့နိုင်မည့် အခြေနေသို့ ရောက်ရှိနိုင်ပါသည်။ရောက်ရှိစေချင်ပါသည်။
၅။ ထို့ကြောင့် ဦးသိန်းစိန် အစိုးအနေနှင့် ပြည်သူကို ယုံကြည်ရန်၊ ပြည်သူကို တရား ဥပဒေအရ ကာကွယ် ပေး ရန် တိုင်းချစ် ပြည်ချစ်စိတ်ဓါတ်ဖြင့် အမိနိုင်ငံအတွက် အသက်ပေး၍ ယုံကြည်ချက်ကြောင့် အကျဉ်းကျခံနေ ရ သော နိုင်ငံရေး အကျဉ်းသားများကို ရန်သူအဖြစ်မမြင်ပဲ မိမိကဲ့သို့ တိုင်းပြည် ချစ် စိတ်ရှိသော်လည်း သဘော ထား အမြင်မတူသည့် အတိုက်အခံအဖြစ် သဘောထား၍ ဒီမိုကရေစီကျင့်စဉ်အရ အမြင်ကွဲလွဲမှုရှိခြင်းကို လက်ခံအသိမှတ်ပြု၍ အမြန်ဆုံးလွတ်ပေးရန် ပန်ကြားလိုက်သည်။
၆။ နိုင်ငံရေး အကျဉ်းသားများကိုလွတ်ပေးပြီး ပြည်ပရောက် မျိုးချစ်များကို လက်ကမ်းကြိုဆိုလျှင် သင့်လျှော် လျောက် ပတ်သော လုပ်ရပ်အဖြစ် ကျွနုပ်တို့က ကြိုဆိုကြမည်ဖြစ် သည်။ သို့ရာတွင် ယခု ဦးသိန်းစိန်၏ ပြောကြားချက်တွင် ကန့်သတ်ချက်များပါရှိနေသဖြင့် အမျိုးသားရင်ကြား စေ့ရေးကို ပြည့်ပြည့်၀၀ ဦးတည်ထားခြင်းမရှိဟု သုံးသပ်သည်။ပြည်တွင်းရှိ နိုင်ငံရေး အကျဉ်းသားများအားလုံး ကို လွတ်ပေးပြီးနောက် ဒုတိယ အဆင့်အနေဖြင့် ပြည်ပရှိ မျိုးချစ်မြန်မာများ အားလုံးကို အထွေထွေလွတ် ငြိမ်းချမ်း သာခွင့်ပေး၍ ပြန်လည် ခေါ်ယူသင့်သည်။
၇။ ထိုမှ တဆင့် အမျိုးသားရင်ကြားစေ့ရေှး၊နှင့် ပြည်တွင်းစစ်ရပ်ဆဲရေးအတွက် ယနေ့တိုင်းရင်းသားပြည်နယ် များတွင်တောက်လောင်နေသော စစ်မီးလျှံများကို အတူတကွ တက်ညီလက်ညီဝိုင်းဝန်း၍ပြည်တွင်း ငြိမ်းချမ်းရေးအတွက်ငြိမ်းသတ် ရန် ဆွေးနွေးလုပ်ဆောင်နိုင်ကြမည် ဖြစ်ပါသည်။
အမိမြန်မာနိုင်ငံတော်ကြီး ကမ္ဘာ့အလယ်တွင် ပြန်လည်ဝင့်ကြွားလာနိုင်ရေးကို မျှော်မှန်းလျှက်
တိုင်းပြည်ကို ချစ်မြတ်နိုးသူများ
ထွန်းအောင်ကျော် ၊ မိုးသီးဇွန် ၊ သက်ထွန်း ၊ သန်းဝင်း ၊ မူးသာ (အမေရိကန်နိုင်ငံ)၊ဆန်နီအောင်သန်းဦး (ဂျာမနီ)၊ ကျော်သန်း (နယူးဒေလီ)၊ကိုကိုအောင် (တိုကျို)၊ သန်းဆွေ ((တိုကျို ဂျပန်) ၊မင်းနိုင် ၊ လားရှိုးသိန်းအောင် (ဂျင်မီဂျက်) (အမေရိကန်နိုင်ငံ)
No comments:
Post a Comment